رسالة الي طالب الثانوية العامة !
رسالة لكل طالب ثانوي (و خاصة 2 ث)
من اخوك او اخوكي مر قبل كده باللي انتو فيه دلوقتي
متدايقش لما يجيلك امتحان صعب وتلاقي كل الطلبة بيقولو زيك انو امتحان صعب
لأن بالشكل ده ،، الامتحان صعب عليك وعلى غيرك ! ،، يعني اللي انت غلطت فيه هو كمان غلطت فيه وغيرك كتير !
فا بدل ما الامتحان كان من 25 ،، بقى كأنو من 24 ،،، لأن نسبه كبيره اوي معرفتش تحل سؤال معين
لو انت مدايق انه حيأثر على مجموعك ،،، فا احب اطمنك انها مش بالمجموع ،،، لأن ممكن الامتحانات تيجي سهلة وتلاقي كلو جايب فوق ال 95 واللي جايب 99 اكتر من الهم على القلب !
فا تلاقيها في الاخر هي هي ،، الموضوع نسبه وتناسب ،،
مجاميع عاليه = تنسيق عالي
مجمايع قليلة = تنسيق قليل
واللي مش مصدقني ،، يبقى يسأل اي حد من قرايبه كان في ثانوية عامة 2008 ، ويسألو التنسيق كان شكلو ايه والمجاميع كانت شكلها ايه
نقطة تانية بقى ،،، الامتحان الصعب فيه ميزة حلوة اوي ،،، انك لو مذاكر كويس وكنت عاطي الماده دي وقتها الكافي وتعبان فيها طول السنه ،، حتحل اكتر من اللي مكنش عامل زيك ،،، فا انت حتبقى مميز عنو
اما بقى لو انت تعباااان طول السنه في مادة ،، وجاه الامتحان اقل من مستواك بكتيييير اوي ،،، حتحس انك اتظلمت ،، لأن اللي ذاكر المادة لمدة 100 ساعه زي اللي ذاكرها لمدة 60 ساعه !!
اخر حاجه بقى ،،، ربنا لما بيديك مجموع ،، مش بيديهولك على الحل اللي انت حليتو في الامتحان ،،، لأ ،، ده بيديهولك على قد تعبك اللي تعبتو طول السنه
ممكن تكون تعبت في مادة طول السنه كتير اوي وكنت كويس فيها ،، وقدرك انك حليت وحش في الامتحان ،،، متقلقش ، ربنا حيعوضك في مادة تانية وبالزيادة كمان ( عن تجربة )
مدرس الفيزيا بتاعي قالي معادلة حلوة اوي
يقين + رضا = راحة
خلي عندك يقين في قدره اللي وفي عدله وفي كرمه ،،، وارضى بكل شيء ربنا يكتبهولك حتى لو مش على هواك او مش زي ما كنت عاوز ( لأن ربنا حيختارلك الاحسن ) ،، لو عملت الاتنين دول ،، حتحس انك مرتاح اوي ومش فارق معاك اي حاجه في الدنيا .....
